ఈ చెట్లకు రంగు రంగుల చీరలు ఎందుకు కట్టారు ? ఇక్కడ ఏదైనా పండ గా ! జాతరా ? కానీ అదేమీ కాదు, ఇదొక జీవన పోరాటం. కొమ్మలకు పూసిన ఒక్క పువ్వు కూడా నేలపై పడకూడదనే పట్టుదల. అడవిలో ఈ చెట్ల చుట్టూ చీరలే కాదు నైలాన్ వలలు కూడా కడుతున్నారు. ఆకాశం నుంచి రాలే ముత్యాల వంటి పూలను ఒడిసి పడుతున్నారు ఆ పువ్వులు అంత విలువైనవా ? వాటిలో ఏముందీ? సేకరించి ఏమి చేస్తారు ? వారి ఆలోచన వెనక ఉన్న అసలు రహస్యం తెలుసుకోవాలంటే... ఛత్తీస్ఘడ్ లోని బస్తర్ అడవుల్లోకి అడుగుపెట్టాల్సిందే!
దండకారణ్యంలో అద్భుతమైన చెట్లు పెరుగుతాయి. అవే ఇప్ప చెట్లు ! అవి ప్రకృతి ఇచ్చిన విలువైన సంపద. ఆ పూలలో సహజమైన శక్తివంతమైన పౌష్టిక విలువలు ఉన్నాయి. ఇప్పపూల పానీయం మనుషులను వందేళ్లు ఆరోగ్యంగా బతికిస్తుందంటారు. ఈ పూలలో ఇంత శక్తి ఉందా? అసలు వీటిని ఎలా సేకరిస్తారు? వాటితో వెరైటీ వంటకాలు ఎలా చేస్తున్నారు? బస్తర్ అడవుల నుండి రూరల్ మీడియా స్పెషల్ స్టోరీ
ఒకపుడు ఇప్ప పూలను నేలమీద పడిన తరువాతే సేకరించేవారు. ఆ సమయంలో దుమ్ము, దూళి అంటి నాణ్యత తగ్గేది. కానీ ఇప్పుడు... సృజనాత్మకంగా ఆలోచించారు బస్తర్ మహిళలు! చెట్లకు చీరెలు, నైలాన్ వలలు కట్టి ... మట్టి అంటకుండా శుభ్రంగా పూలను సేకరిస్తున్నారు. దీంతో నాణ్యత పెరిగింది, ఉత్పత్తులు మరింత స్వచ్ఛంగా తయారవుతున్నాయి. ............................. సేకరించిన పూలను ఒకపుడు నేల మీదనే ఆర బెట్టే వారు... ఇపుడు సోలార్ డ్రయర్లో ఎండ బెడుతున్నారు. దీంతో పూల సహజమైన రుచి, ఔషధ విలువలు చెదరకుండా, ఎక్కువ కాలం నిల్వ ఉంటాయి.
ఆధునిక వంటశాలల్లో, బస్తర్ మహిళలు తమ పాక నైపుణ్యాన్ని చూపిస్తున్నారు. ఇప్ప పూలతో లడ్డూలు, కరకరలాడే బిస్కెట్లు తయారు చేస్తున్నారు. అంతే కాదు, టీ సాచెట్స్ కూడా చేస్తూ ఆరోగ్యవంతమైన ఛాయ్ ని రుచి చూపిస్తున్నారు. ఈ ఉత్పత్తులలో రుచితో పాటు యాంటీ ఆక్సిడెంట్లు, విటమిన్లు పుష్కలంగా ఉంటాయి, ఇప్ప పూలలో చిన్నారుల్లో రక్త హీనతను తగ్గించి, కంటి చూపును మెరుగు పరిచే ఔషధ గుణాలున్నాయి. ప్రోటీన్, కాల్షియం, ఐరన్ తో నిండిన సూపర్ఫుడ్ ఇది. తెలంగాణలోని కొత్తగూడెంలో ఇప్ప చాక్లెట్లు , ఉట్నూరులో లడ్డూలు, బర్ఫీలు తయారు చేస్తున్నారు. ఆంధ్రప్రదేశ్లోని చింతూరు మన్యంలో ఇప్ప గింజల నుండి తైలం కూడా తీస్తున్నారు. ఇది మోకాలి నొప్పుల నివారణకు అమోఘంగా పనిచేస్తుందని అక్కడి ఆదివాసీలు నమ్ముతారు.
. అడవుల్లో సహజంగా పెరిగే ఇప్ప చెట్లు పేదలకు జీవనాధారమయ్యాయి. ఆదివాసీలు అటవీ సంపదను కాపాడుతూ, సంప్రదాయాన్ని కొనసాగిస్తూ, కొత్త తరానికి విలువైన పోషకాహారాన్ని అందిస్తు ఉజ్వల భవిష్యత్తును నిర్మిస్తున్నారు.
ఇప్ప చెట్టు నిజంగా... అద్భుతమైన జీవన చెట్టు! Video link- https://youtu.be/Ow_8azU9YCE
కామెంట్లు లేవు:
కామెంట్ను పోస్ట్ చేయండి